नेपाल प्रिमियर लिग (एनपीएल) को तेस्रो संस्करणमा पुरस्कार राशि वृद्धि भएको छ ।
नेपाल क्रिकेट संघ (क्यान) ले एनपीएलको तेस्रो संस्करणको विजेताले १ करोढ ५० लाख रुपैयाँ पुरस्कार पाउने जानकारी दिएको हो । यसअघि एनपीएलको पहिलो र दोस्रो संस्करणका विजेताले १ करोड रुपैयाँ पुरस्कार पाएका थिए ।
एनपीएलको तेस्रो संस्करणमा विजेताको पुरस्कार राशि ५० लाख रुपैयाँले बढाइएको क्यान कोषाध्यक्ष पदम खड्काले जानकारी दिए ।
एनपीएलको तेस्रो संस्करणको अघिल्लो दिन आइतबार त्रिवि अन्तर्राष्ट्रिय क्रिकेट मैदानमा आयोजित पत्रकार सम्मेलनमा कोषाध्यक्ष खड्काले एनपीएलको आम्दानीमा वृद्धि भएकाले पुरस्कार राशि पनि बढाइएको बताए ।
'यस सिजन प्रायोजनबाट २० करोड र टिकटिङ तथा प्रसारण अधिकार (ब्रोडकास्टिङ) बाट ७० करोड रुपैयाँभन्दा बढी आम्दानी हुने अपेक्षा गरेका छौँ,’ खड्काले भने, ’२७ दिन चल्ने प्रतियोगिताको अवधिभर एनपीएलको कुल आम्दानी १ अर्ब ५० करोड रुपैयाँभन्दा बढी पुग्ने अनुमान छ । त्यसैले यसपटक पुरस्कार राशि बढाएका हौँ ।’
कोषाध्यक्ष खड्काका अनुसार, यसपटक उपविजेता टिमले ८० लाख रुपैयाँ पुरस्कार पाउनेछ । यस्तै, तेस्रो हुने टिमले ४० लाख र चौथो हुने टिमले ३० लाख रुपैयाँ पाउने कोषाध्यक्ष खड्काले बताए ।
क्यानको वर्तमान नेतृत्वले नेपाली क्रिकेटलाई आर्थिक रूपमा सबल र आत्मनिर्भर बनाउने तथा संस्थाको कार्यकाललाई उपलब्धिमुलक बनाउने लक्ष्यसहित काम गरिरहेको कोषाध्यक्ष खड्काले बताए ।
एनपीएलको पहिलो संस्करणदेखि तेस्रो संस्करणसम्म आइपुग्दा प्रतियोगिताले आर्थिक रूपमा उल्लेखनीय प्रगति गरेको र यसले नेपाली क्रिकेटको व्यावसायिक विकासमा थप योगदान पुर्याउने अपेक्षा क्यानको छ ।
