काठमाडौं । आदिवासी जनजाति उत्थान राष्ट्रिय प्रतिष्ठानले पहिलोपटक नेपाल आदिवासी ज्ञान सम्मेलन\महोत्सव –२०८२ आयोजना गर्ने भएको छ ।
सोमबार काठमाडौंमा पत्रकार सम्मेलनको आयोजनागरी प्रतिष्ठानको रजत जयन्तीको अवसरमा यही माघ २५ देखि २७ सम्म ज्ञान सम्मेलन गर्न लागेको जानकारी दिएको हो ।
नेपाल आदिवासी ज्ञान सम्मेलन÷महोत्सवले आदिवासी समुदाय, विद्वत वर्ग, अध्येताहरू, नीति निर्मार्ताहरूलाई एकै थलोमा ल्याई आदिवासी ज्ञानको आदान–प्रदान,उत्सव, संरक्षण र पुनर्जीवनका लागि साझा मञ्च सिर्जना गर्ने लक्ष्य राखेको छ । यो सम्मेलन बौद्धिक विमर्श, नीतिगत संवाद र सांस्कृतिक उत्सवलाई एउटै फ्रेममा समेट्ने विशिष्ट प्रयास गर्ने प्रतिष्ठानले जनाएको छ ।
आदिवासी ज्ञान र अभ्यासको आदान–प्रदान, सांस्कृतिक विविधताको उत्सव, ज्ञानको दस्तावेजीकरण, पुस्तान्तरण र डिजिटलीकरणमार्फत संरक्षण, तथा स्थानीयदेखि विश्वव्यापी तहसम्म आदिवासी आवाजको सशक्तीकरण गर्नु सम्मेलनको प्रमुख उद्देश्य हो ।
ज्ञान सम्मेलनको दोश्रो दिन आदिवासी परम्परा, ज्ञान प्रणालीलाई व्यापकिकरण गर्न सरकार र आदिवासी जनजातिविच सेतुको भूमिका निर्वाह गर्ने प्रतिष्ठान भएकाले निम्न शीर्षकहरूमा विषयविज्ञहरू, कार्यान्वयन गर्ने निकायका अधिकारीहरूसंग प्यानल छलफल तथा अनुभव आदानप्रदान हुनेछ ।
साथै, सम्मेलनसँगै खाना महोत्सव आयोजना हुने छ । महोत्सवमा थारू, शेर्पा, थकाली, नेवारी र राई समुदायका परिकारहरू हुनेछन । जसले आदिवासी संस्कृतिको जीवन्त स्वाद र पहिचानलाई उजागर गर्नेछ । रजत जयन्तीको अर्को आकर्षणको रूपमा भोटे, छन्त्याल, मगर, गुरूङ, सुनुवार र तामाङ समुदायको ठेट सांस्कृतिक प्रस्तुतीहरू रहनेछन् ।
अन्तर्राष्ट्रिय आदिवासी भाषा दशक (सन् २०२२–२०३२) लाई व्यावहारमा कार्यान्वयन गर्ने प्रयासस्वरुप प्रत्येक प्यानल छलफल र विषयगत सेमिनारहरूको सुरूमा लोपोन्मुख आदिवासी जनजातिको भाषाबाट कार्यक्रम उद्घोषण गरेर प्रारम्भ गरिनेछ । त्यस्तै, प्रत्येक प्यानल छलफल र विषयगत सेमिनारहरूमा अध्यक्षता ग्रहणसंगै आदिवासी जनजाति एक जना सम्मानित व्यक्तित्वलाई सभाको संरक्षकको रूपमा सम्वन्धित आदिवासी जनजातिको पहिचान झल्कने भेषभूषामा विशेष आसन ग्रहण गराइनेछ ।
माघ २७ गते आदिवासी जनजातिका सवालमा केन्द्रित १५ वटा विषयगत शीर्षकहरूमा ८१ वटा अनुसन्धानात्मक कार्यपत्रहरू प्रस्तुत हुनेछन् । सोही दिन प्रतिष्ठानका अध्यक्ष तथा प्रधानमन्त्री सुशिला कार्कीको प्रमुख आथित्यतामा रजत जयन्तीको समापन समारोह गरिनेछ ।
कार्यक्रममा देश भित्र र बाहिर गरी ८०० भन्दा बढी आदिवासी जनजाति अभियन्ता, अध्येताहरू, विद्दत व्यक्तित्वहरू, युवा बिद्यार्थीहरूको सहभागीता रहने प्रतिष्ठानले जानकारी दिएको छ ।